మహారాష్ట్రలో 2,500 టన్నుల బియ్యానికి ఎఫ్‌సీఐ వేలం

మహారాష్ట్రలో నవంబర్ 11, 12 తేదీల్లో జరిగే ఆన్‌లైన్ వేలాలకు భారత ఆహార సంస్థ (ఎఫ్‌సీఐ) మొత్తం 2,500 టన్నుల బియ్యాన్ని అందుబాటులో ఉంచింది. రెండు వేలాలకు కలిపి ఇచ్చిన నిల్వల పరిమాణమిదని ఎఫ్‌సీఐ ప్రాంతీయ కార్యాలయం నవంబర్ 10న ముంబయి ప్రెస్ ఇన్ఫర్మేషన్ బ్యూరో ద్వారా తెలిపింది.

దేశీయ బహిరంగ మార్కెట్ విక్రయ పథకం కింద ఈ వేలాలు జరుగుతున్నాయి. బియ్యాన్ని పెద్ద మొత్తంలో కొనేవారు, బియ్యం ఉత్పత్తుల తయారీదారులు, ఆహార శుద్ధి సంస్థలు, ప్రైవేటు వ్యాపారులు, అర్హత ఉన్న సహకార సంస్థలు వేలం నిర్వహించే సంస్థ వద్ద నమోదు చేసుకొని పాల్గొనవచ్చు. మహారాష్ట్రలో ఈ పథకం కింద జూలై నాలుగో వారం నుంచి ఎఫ్‌సీఐ బియ్యాన్ని వేలానికి ఉంచుతోంది.