ఇస్లామిక్‌ రీసెర్చ్‌ ఫౌండేషన్‌పై నిషేధాన్ని ఐదేళ్లు పొడిగించిన కేంద్రం

చట్టవిరుద్ధ కార్యకలాపాల (నివారణ) చట్టం కింద ఇస్లామిక్‌ రీసెర్చ్‌ ఫౌండేషన్‌పై నిషేధాన్ని కేంద్ర హోం మంత్రిత్వ శాఖ పొడిగించిందని ప్రెస్‌ ఇన్ఫర్మేషన్‌ బ్యూరో (పీఐబీ) నవంబరు 13న తెలిపింది. జాకిర్‌ నాయక్‌ నేతృత్వంలోని ఈ ఫౌండేషన్‌ను చట్టవిరుద్ధ సంఘంగా మంత్రిత్వ శాఖ మరోసారి ప్రకటించింది.

నవంబరు 13న భారత గెజిట్‌లో ప్రచురించిన ప్రకటన ప్రకారం ఈ నిర్ణయం వెంటనే అమల్లోకి వచ్చింది. ప్రచురించిన తేదీ నుంచి ఐదేళ్ల పాటు ఇది వర్తిస్తుంది. అయితే చట్టంలోని సెక్షన్‌ 4 కింద జారీ అయ్యే ఉత్తర్వులకు ఇది లోబడి ఉంటుంది. మునుపటి నిషేధం గడువు నవంబరు 14న ముగియాల్సి ఉందని గెజిట్‌ ప్రకటన పేర్కొంది.