ఆస్ట్రోమ్‌ ఉపగ్రహ పరిశోధనకు రూ.64.05 కోట్ల ఆర్థిక సాయం ఒప్పందం

బెంగళూరుకు చెందిన ఆస్ట్రోమ్‌ టెక్నాలజీస్‌కు రూ.64.05 కోట్ల ఆర్థిక సాయం అందించేందుకు టెక్నాలజీ డెవలప్‌మెంట్‌ బోర్డు ఒప్పందం కుదుర్చుకుందని కేంద్ర శాస్త్ర సాంకేతిక విభాగం నవంబరు 12న ప్రకటించింది. పరిశోధన, అభివృద్ధి, ఆవిష్కరణల నిధి నుంచి ఈ సాయం అందించనున్నారు.

ఎలక్ట్రానిక్‌ నిఘా కోసం ఉపగ్రహ సమూహాన్ని అభివృద్ధి చేయాలనేది సంస్థ ప్రణాళిక అని విభాగం తెలిపింది. ఒప్పందం ప్రకారం ఈ సాయం అవసరమైతే వాటాలుగా మార్చుకునే వీలున్న రుణం రూపంలో ఉంటుంది. ప్రతిపాదిత వ్యవస్థ అభివృద్ధికి, దాని పనితీరును పరీక్షించడానికి ఈ నిధులు ఉపయోగపడతాయి.